«Саяхат» автовокзалы аумағында үй тұрғызылуы мүмкін
Алматы әкімдігінің баспасөз қызметі қалада бұрын «Саяхат» автовокзалы орналасқан аумақта тұрғын үй кешені салынуы мүмкін екенін айтты, деп хабарлайды Qazaq.today Tengrinews.kz -ке сілтеме жасап.
Шенеуніктердің айтуынша, қазіргі уақытта автовокзал жері мемлекет меншігінде емес. Бірнеше жыл бұрын оны жеке компания сатып алған.
«Жер учаскесінің иесі 2018 жылғы 1 қазандағы сатып алу-сату шарты негізінде Sayahat Realty ЖШС саналады. Жер телімінің нысаналы мақсаты — коммерциялық үй-жайлары мен жерасты автотұрағы бар көп функционалды тұрғын үй кешені.
Қазіргі уақытта алаң қоршалған, құрылыс-монтаж жұмыстары жүргізілмейді. Жоба алдындағы құжаттаманың толық пакеті жоқ», — деді қала құрылысын бақылау басқармасы өкілдері.
Еске салайық, бұған дейін алматылықтар «Саяхат» автовокзалы ауданындағы шектеулерге шағымданғаны хабарланған болатын. Олардың айтуынша, қаланың қақ ортасында бес гектар аумақ темір қоршаумен қоршалған және автотұраққа рұқсат жоқ.
Qazaq.today
