АҚШ-та 76 жастағы әйел бұрынғы күйеуі мен оның сүйіктісін атып өлтірді
АҚШ-тың Джорджия штатында 76 жастағы Грейс Эдж бұрынғы күйеуі мен оның сүйіктісін атып өлтірді деп айыпталды. Тергеу қызғанышты ықтимал себеп ретінде қарастыруда.
Фото: ИА «NewTimes.kz»
АҚШ-тың Джорджия штатында 76 жастағы Грейс Эдж бұрынғы күйеуі мен оның жаңа сүйіктісін өлтірді деп айыпталды. Тергеу нұсқасы бойынша, әйел жұп тұратын тіркеме үйге басып кіріп, оқ жаудырған. Салдарынан екі адам қаза тауып, тағы бір әйел жараланды.
Бұл туралы Qazaqtoday.info сайты хабарлайды.
Оқиға Тумбс округінде болған. Қаза тапқандар — 75 жастағы Уоллес Труман Эдж және оның 40 жастағы сүйіктісі Памела Кук. Атыс кезінде үйде Памеланың 55 жастағы анасы Дайан Кук та болған. Ол қолынан оқ жарақатын алды.
Құқық қорғау органдарының деректеріне сәйкес, шабуылдаушы бес рет оқ атқан. Атыстан кейін ол қашып кеткен, ал қаза тапқан әйелдің анасы жедел қызметтерге хабарласып, диспетчерге әйелдің ешқандай ескертусіз және алдын ала ұрыс-керіссіз оқ ата бастағанын айтқан.
Оқиға орнына келген шериф көмекшілері сағат 14:30 шамасында Уоллес Эдж пен Памела Куктің өлі денелерін тапқан.
Болғаннан кейін Грейс Эдж Тумбс округінің шериф кеңсесіне өз бетінше келіп, билікке тапсырылған.
Шериф Джордан Кайт ерлі-зайыптылардың 10 жылдан астам уақыт бойы ажырасу үстінде болғанын хабарлады. Оның айтуынша, полицияны олардың үйіне тұрмыстық жанжалдарға байланысты кемінде 12 рет шақырған.
Құқық қорғау органдары қызғанышты қылмыстың ықтимал себебі ретінде қарастыруда. Алайда болған оқиғаның түпкілікті мән-жайы әлі анықталуда.
Қазір Грейс Эдж қамауда. Оған жеті айып тағылды, оның ішінде қасақана кісі өлтіру, ауырлататын мән-жайлардағы кісі өлтіру және ауырлататын мән-жайлардағы шабуыл. Тергеуді Джорджия штатының тергеу бюросы жүргізуде.
Бұған дейін Абай облысының тұрғыны кассациялық сотта істі қайта қараудан кейін бостандыққа шыққан болатын. 2024 жылдың шілдесінде ол күйеуін тұншықтырып жатқан еркекті ағаш кесіндісімен ұрған. Шабуылдаушы қаза тапқан. Бастапқыда әйел ҚР ҚК 106-бабының 3-бөлігі бойынша 6 жылға сотталып, одан 3 млн теңге моральдық зиян өндірілген. Кассациялық сот әйелдің күйеуін қорғағанын, бірақ қажетті қорғаныс шегінен асқанын анықтады. Оның әрекеттері ҚР ҚК 112-бабының 2-бөлігіне қайта сараланды, ал жазасы 1 жылға бас бостандығынан айыруға дейін қысқартылды. Бұл мерзімді ол бұрын өтегендіктен, әйел сот залында босатылды.
