Жайықтың деңгейі 9,5 метрге дейін көтерілуі мүмкін – ТЖМ
Фото: Атырау облысы жедел штабы
Батыс Қазақстан облысы Төтенше жағдайлар департаментінің ресми өкілі Нұржан Төлеуіш өңірдегі ахуал күрделі екенін айтты, деп хабарлайды Qazaq Today ақпарат агенттігі.
«Қазіргі таңда жағдай күрделі. Өйткені Жайықтың су деңгейі әлі көтеріліп жатыр. «Қазгидрометтің» баяндауынша, қазіргі деңгейі 8 метр 62 сантиметрге жеткен. Жалпы қауіпті деңгей – 8 метр 50 сантиметр. Яғни, қауіпті деңгейден 12 сантиметр асып отыр», — деді ол орталық коммуникациялар қызметінде өткен брифингіде.
Оның сөзінше, 25-26 сәуір күндері жағдай ушыға түсуі мүмкін.
«Біздің облыс бойынша қауіптің беті әлі де қайтқан жоқ. Су деңгейі әлі де көтеріледі деген болжам бар. Орал қаласының тұсында Жайық деңгейі 25-26 сәуірде 9,5 метрге баруы мүмкін», — деді Нұржан Төлеуіш.
