Балалар арбасымен қоғамдық көлікке тыйым салынғаны туралы ақпарат жалған
Қазақстан Көлік министрлігі балалар арбасымен қоғамдық көлікке тыйым салынғаны туралы сыбыстарды жоққа шығарды. Жаңартылған қағидалар бойынша арбаны бүктеу тек ұсынылады, айыппұл қарастырылмаған.
Сурет: inbusiness.kz
Балалар арбасымен қоғамдық көлікке тыйым салынды деген сыбыстар шындыққа сәйкес келмейді. Қазақстан Республикасы Көлік министрлігінің баспасөз қызметі мұндай шектеулердің жоқ екенін және ешқандай айыппұл қарастырылмағанын мәлімдеді.
Бұл туралы Qazaqtoday.info сайты хабарлайды.
Ведомство түсіндіргендей, жаңартылған «Автомобиль көлігімен жолаушылар мен багаж тасымалдау қағидаларына» сәйкес, қарбалас уақытта және салон толы болған кезде арбаны бүктелген күйде тасымалдауға рұқсат етіледі. Бұл ретте ата-анаға бос орын болуы және арбаның өзі басқа адамдардың жүріп-тұруына кедергі келтірмеуі шарт. Бұл норма тек балалар мен оларды алып жүрген ересектердің қауіпсіздігін қамтамасыз ету, сондай-ақ салонда бос кеңістікті сақтау мақсатында енгізілген.
Сонымен қатар, Көлік министрлігі маңызды нақтылау жасады: егер ата-ананың арбаны бүктеуге мүмкіндігі болмаса немесе оған қолайсыз болса, ол арбаны ашылған күйде ұстап, сапарды жалғастыруға құқылы. Бұл үшін ешқандай санкция қолданылмайды.
