Криптовалютаға ақша салып, ұтылсаңыз, шығынды ешкім өтемеуі мүмкін

Криптовалютадан табыс табамын деп, ақшасынан айырылған қазақстандықтарға шығын автоматты түрде қайтарылмайды, деп хабарлайды Qazaqtoday.info ақпарат порталы. 

Ұлттық банк төрағасының орынбасары Бинур Жаленовтың айтуынша, азамат тәуекелді біле тұра криптовалюта сатып алып, оның бағасы құлдыраса, бұған платформаның кінәсі болмауы мүмкін.

Яғни лицензиясы бар криптобиржаны пайдалану салған ақшаңыз толық қорғалған деген сөз емес. Реттеушілер лицензия бергенде платформаның капиталы мен тәуекелді жабуға арналған қаражатын тексереді, бірақ бұл инвесторды нарықтағы шығыннан сақтандырмайды.

Ал ақша платформаның немесе төлем жүйесінің кінәсінен жоғалса, жағдай жеке қаралады. Оның үстіне, криптоплатформалардың қай органға бағынатыны да әртүрлі: бірі АХҚО аясында, енді бірі Ұлттық банк реттейтін ортада жұмыс істейді.

Сондықтан мәселе туындаса, азамат алдымен ақшасының қай юрисдикциядағы платформада тұрғанын анықтап, содан кейін ғана тиісті реттеушіге жүгінуге мәжбүр.