Петропавл маңындағы өрт: 110 адам мен 31 техника жалынмен күресуде

Фото: ТЖМ

Петропавл қаласының маңында ауқымды өрт тіркелді. Қаланың айналма жолы мен тұрмыстық қалдықтар полигоны орналасқан аумақта құрғақ шөп тұтанған.

Бұл туралы Qazaqtoday.info сайты хабарлайды.

Өрт бірнеше сағатқа созылып, аймақты қою қара түтін басқан. Ащы түтін қала орталығына жеткендіктен, тұрғындар көрудің қиындағанын және ауада күйік иісі қатты сезілетінін айтып отыр.

Солтүстік Қазақстан облысы Төтенше жағдайлар департаментінің мәліметінше, алдын ала есеп бойынша өрт шамамен 6 гектар аумақты шарпыған.

Қазіргі уақытта өрт сөндірушілер учаскелердің біріндегі жалынды толық ауыздықтады. Қалған екі учаскеде сөндіру жұмыстары жалғасып жатыр.

Тілсіз жаумен күреске 110 адам мен 31 техника жұмылдырылған. Оқиға орнында жедел штаб құрылып, төрт өрт сөндіру учаскесі ұйымдастырылды. Сонымен қатар теміржол кәсіпорнының өрт сөндіру пойызы тартылған.

Құтқарушылардың жұмысын қатты жел қиындатып отыр. Мамандардың басты мақсаты – жалынның жақын маңдағы жеке үйлер мен саяжайларға таралуына жол бермеу.

Қазір өртті толықтай сөндіріп, жағдайды тұрақтандыру бағытында жұмыстар жүргізіліп жатыр.