Мемлекет басшысы Сингапур Президентін ұлттық мерекемен құттықтады
Қасым-Жомарт Тоқаев Сингапур Президенті Тарман Шанмугаратнамды Тәуелсіздік күнімен құттықтап, достық пен ынтымақтастықтың дами беретінін атап өтті.
Мемлекет басшысы Қасым-Жомарт Тоқаев Сингапур Президенті Тарман Шанмугаратнамды және оның отандастарын Сингапурдың ұлттық мейрамы – Тәуелсіздік күнімен құттықтады, деп хабарлайды Qazaqtoday.info сайты.
Президент жеделхатында бұл мерекенің Сингапур халқы үшін маңыздылығы ерекше атап өтілген. Ол ұлттық бірліктің, мемлекет тәуелсіздігінің және орнықты дамудың символы ретінде сипатталған. Сондай-ақ Қазақстан мен Сингапур арасындағы достық пен өзара түсіністікке негізделген көпқырлы ынтымақтастықтың екі халықтың игілігі үшін әрі қарай дами беретініне сенім білдірілген.
Қасым-Жомарт Тоқаев Тарман Шанмугаратнамға жауапты қызметінде табыс, ал Сингапур халқына құт-береке тіледі.
