АҚШ Сенаты Ресей мен Иранға қарсы жаңа санкциялар пакетін мақұлдады

АҚШ Сенаты Ресейге қарсы ең қатаң санкциялардың бірін енгізуге мүмкіндік беретін заң жобасын басым дауыспен мақұлдады. Дауыс беру кезінде 86 сенатор қолдап, 11 сенатор қарсы болды. Заң жобасының өтуі үшін кемінде 60 дауыс қажет еді, деп хабарлайды Qazaqtoday.info сайты.

Құжатта Ресейге қарсы қосымша санкциялар енгізу, сондай-ақ Ресей мұнайы мен газын сатып алатын басқа мемлекеттерге жоғары тарифтер салу мүмкіндігі қарастырылған. Бұған Қытай мен Үндістан сияқты ірі экономикалар да ілігуі мүмкін.

Сонымен қатар пакетке Иранға қатысты санкциялар да енгізілген. Бұл өзгерісті Дональд Трамптың өзі талап еткен болатын.

Енді заң жобасы Өкілдер палатасына жіберіледі. Ол жақтағы қарау қыркүйек айында басталуы мүмкін. Егер палата да мақұлдаса, құжат Дональд Трамптың қол қоюына жіберіледі.

Алайда бұл бастамаға АҚШ-тың өз ішінде де қарсылық бар. Республикалық сенатор Рэнд Полдың пікірінше, мұндай санкциялар Украинадағы соғысты тоқтатпайды. Керісінше, Ресеймен сауда жасайтын елдерге салынатын тарифтер америкалық экономикаға әсер етіп, қарапайым азаматтардың шығынын арттыруы мүмкін.

Яғни Вашингтон Ресейге қысымды күшейткісі келсе де, санкциялардың жанама салдары АҚШ-тың өз тұтынушыларына да тиюі ықтимал. Ең қызығы – бұл заңның басты қаруы тек Ресейге қарсы санкция емес. АҚШ Ресейден энергия сатып алуды жалғастыратын үшінші елдерге де экономикалық қысым жасауға тырысып отыр. Бұл жағдайда мәселе Ресей мен Украина арасындағы соғыстан асып, АҚШ, Ресей, Қытай, Үндістан және Иран арасындағы үлкен экономикалық текетіреске айналуы мүмкін.