Қазақстанда жалған дәрі-дәрмек сатқандар ұсталды

Қазақстанда төрт фармацевтикалық компания жалған дәрі-дәрмек өндіріп, сатқан, деп хабарлайды Qazaqtoday.info сайты.

Ішкі істер министрлігі мен Ұлттық қауіпсіздік комитетінің қызметкерлері көршілес мемлекеттерден дәрі-дәрмекті контрабандалық жолмен әкелу схемасын ұйымдастырған төрт фармкомпанияның жұмысын тоқтатты. Сонымен қатар, күдіктілер жасырын цехтарда қолдан жасалған дәрілерді дайындаған. Құқық қорғау органдары пара алып, ұйымдастырушыларға қамқорлық жасаған фармбақылау департаментінің лауазымды тұлғаларын анықтап, ұстады.

Тауар айналымы мен қаржылық ағындарды талдау контрабандалық және контрафактілік әрекеттердің көлеңкелі схемаларының бар екенін растады. Алдын ала деректер бойынша, өткен жылы мемлекетке 800 миллион теңгеден астам салық төленбеген. Схеманың ұйымдастырушылары мен олардың көмекшілері уақытша ұстау изоляторына орналастырылды. Сотқа дейінгі тергеу жалғасуда.