Өскеменде мектеп өртенді
Фото: ТЖМ
Өскемен қаласындағы Әміре Қашаубаев көшесінде орналасқан мектептердің бірінде өрт шықты, деп хабарлайды Qazaqtoday.info сайты.
Төтенше жағдайлар министрлігінің мәліметінше, өрт сөндірушілер оқиға орнына жеткен кезде мектептің қабылдау бөлмесіндегі жиһаз жанған. Қызыл жалын 20 шаршы метр аумақты шарпыған. Өрт сөндірушілер тілсіз жауды қысқа уақыт ішінде толық ауыздықтады.
Оқиға кезінде мектептегі мұғалімдер мен оқушылар ғимараттан өз бетімен эвакуацияланған. Зардап шеккендер тіркелген жоқ.
Қазіргі уақытта өрттің шығу себептері анықталып жатыр.
