Вьетнамда заңсыз ойын бизнесін ұйымдастырды деген күдікпен іздеуде жүрген танымал блогер Қайсар Қамза ұсталды, деп хабарлайды Qazaqtoday ақпарат агенттігі.
Қазақстанның Ішкі істер министрлігі күдіктіні Камрань қаласында Интерпол мен жергілікті полицияның көмегімен қолға түсіргенін мәлімдеді.
Тергеу мәліметінше, ол әлеуметтік желідегі парақшаларында онлайн-казиноның жарнамалық видеоларын жүйелі түрде жариялап, оқырмандарын құмар ойындарға тартқан.
«Күдікті заңсыз әрекеттерінің нәтижесінде 100 миллион теңгеден астам заңсыз табыс тапқан. Ақшаны өз атына тіркелген криптовалюта әмиянына аударып отырған», — деп хабарлады министрлік.
Қазіргі уақытта оны Қазақстанға экстрадициялау мәселесі қарастырылып жатыр.
Фото: Әлеуметтік желіден
