Жалақыны көбейтіп, ақшаны қолма-қол қайтарып алған: бас дәрігер күдікке ілінді
Жамбыл облысындағы аурухананың бұрынғы бас дәрігері мен есепшілері 49 млн теңге жымқырды деп айыпталуда. Қазір істі ҰҚК тергеп жатыр.
Жамбыл облысында көпбейінді орталық аудандық аурухананың бұрынғы бас дәрігері 49 миллион теңге бюджет қаражатын жымқырды деген күдікке ілінді, деп хабарлайды Qazaqtoday ақпарат агенттігі.
Бұл ақпаратты облыс прокуратурасы растады. Қадағалау органы ірі көлемдегі қаржылық заңбұзушылықты емхана жұмысын тексеру барысында анықтаған.
«Бұрынғы бас дәрігер есепшілермен бірге 2023 жылдың ақпаны мен 2024 жылдың наурызы аралығында жалпы сомасы 49 млн теңге бюджет қаражатын жымқырғаны белгілі болды. Олар қызметкерлердің жалақысын әдейі көбейтіп жазып, артылған соманы қолма-қол қайтарып алған. Сонымен қатар орындалмаған жұмыстар үшін үшінші тұлғаларға, оның ішінде жеке кәсіпкерлерге негізсіз ақша аударып отырған», — делінген хабарламада.
Тексерістен кейін прокуратура аурухана басшылығы мен есепшілеріне қатысты сотқа дейінгі тергеуді бастады. Қазір бұл істі Ұлттық қауіпсіздік комитетінің өңірлік департаменті тергеп жатыр.
Облыстық денсаулық сақтау басқармасының мәліметінше, бұрынғы бас дәрігер бір айдан астам уақыт жұмыста себепсіз болмағаны үшін қызметінен босатылған.
Фото: Әлеуметтік желіден
