Бүйрегін 25 мың долларға сатпақ болған: Көкшетауда ер адам ұсталды
Көкшетауда өз бүйрегін 25 мың долларға сатпақ болған ер адам ұсталды. Ол интернет арқылы хабарландыру беріп, ақша алып жатқан жерінен қолға түсті.
Көкшетау қаласында өз бүйрегін 25 мың АҚШ долларына сатпақ болған ер адам қылмыс үстінде қолға түсті, деп хабарлайды Qazaqtoday ақпарат агенттігі.
Полиция департаментінің мәліметінше, ол интернетке хабарландыру жариялап, өз ағзасына сатып алушы тапқан. Келісім бойынша ақшаның бір бөлігін алып жатқан сәтте оны жедел уәкілдер ұстады.
Тінту кезінде одан ақша, ұялы телефон, сондай-ақ операцияға дайындалғанын растайтын түрлі медициналық анықтамалар мен сараптама нәтижелері тәркіленді.
Қазіргі уақытта осы дерек бойынша қылмыстық іс қозғалып, тергеу амалдары жүргізіліп жатыр. Құқық қорғау органдары оқиғаның барлық мән-жайын анықтауда.
Фото: Әлеуметтік желіден
