Мысырға саяхаттайтын қазақстандықтар үшін виза құны көтерілді. Бұл туралы елдің Туристік компаниялар мен агенттіктер палатасы мәлімдеді, деп хабарлайды Qazaqtoday ақпарат агенттігі.
Жаңа ережеге сәйкес, 1 наурыздан бастап туристердің елге кірген кезде бақылау-өткізу бекеттерінде ресімдейтін визасының бағасы өсті. Туристік компанияларға өз бағдарламаларын жаңартып, шетелдік серіктестерімен жаңа тарифтерді келісу тапсырылды.
«Қазақстан азаматтары енді Мысырға шұғыл кіру визасы үшін бұрынғы 25 доллардың (12,4 мың теңге) орнына 30 доллар (14,9 мың теңге) төлейтін болады», — делінген ресми хабарламада.
Палата өкілдері тарифті өзгерту арқылы туризм саласын дамытып, келушілерге көрсетілетін қызмет сапасын арттыруды көздейтінін жеткізді. Олардың айтуынша, қабылданған шаралар Мысырдың туристік бағыт ретіндегі беделін нығайтуға бағытталған және елге келушілер ағынының артуымен сәйкес келеді.
Фото: Әлеуметтік желіден
