Павлодарда вокзал маңындағы жылы аялдамаларды қаңғыбастар иемденіп алған

Фото: видеодан скрин

Павлодар қаласында вокзал маңындағы жылы аялдамаларға қатысты дау туындады. Тұрғындардың айтуынша, аялдамалар қазіргі таңда тұрақты мекенжайы жоқ адамдардың уақытша панасына айналған. Олардың ішінде спирттік ішімдік ішу, қоғамдық тәртіпті бұзу фактілері жиілеп кеткені айтылуда. Бұл туралы QazaqToday.info ақпараттық порталы хабарлайды.

Соның салдарынан қала тұрғындары, әсіресе суық әрі жаңбырлы күндері, аялдамаларды өз мақсатына сай пайдалана алмай отыр.
Мәселенің өзектілігі – аялдамалардың дәл жанында полиция бекеті бола тұра, нақты шара қолданылмай отырғаны. Белсенділер тиісті органдардан тексеріс жүргізіп, қоғамдық тәртіпті қалпына келтіруді және мұндай адамдарды арнайы әлеуметтік мекемелерге бағыттауды сұрайды.

Бұл жағдай әлеуметтік осал топтарға жүйелі қолдау мен қоғамдық кеңістікті бақылаудың әлсіздігін көрсетеді. Ал әкімдік тарапынан нақты әрі жедел әрекет болмағаны қала инфрақұрылымын басқарудағы жауапкершіліктің ақсап тұрғанын аңғартады.