Маңғыстауда 600 миллион теңгеден астам қаржы қолды болған

Фото: Pixabay

Маңғыстау облысының прокуратурасы өңірдегі медициналық ұйымдардың қызметінде жүйелі бұзушылықтар болғанын анықтады. Бұл туралы QazaqToday.info ақпараттық порталы хабарлайды.

Облыстағы медициналық мекемелерде:

• Жалған медициналық қызметтер көрсетілген;
• Денсаулық сақтау мамандары біліктілік талаптарына сәйкес келмейді;
• Сыбайлас жемқорлық құқық бұзушылықтар анықталды.

Ұйымдардың бірін тексеру кезінде 600 миллион теңгеден астам бюджет қаражаты жымқырылғаны анықталды.

“Алушылардың банктік деректемелерін ауыстыру арқылы қаражаттар заңсыз алынып, аффилирленген шоттарға аударылған. Сондай-ақ көрсетілмеген қызметтер, жеткізілмеген дәрі-дәрмектер мен медициналық бұйымдар үшін ақы төлеу фактілері анықталды”, – деп мәлімдеді өңірлік прокуратура.

Аталған мән-жайлар бойынша облыс прокуратурасы сотқа дейінгі тергеп-тексеруді бастады, оларды арнайы прокурорлар жүргізіп жатыр.