Астана мен Исламабад жақындасты: 37 құжат бекітіліп, жаңа сауда жолы ашылады
Президент Тоқаевтың Пәкістанға сапары кезінде 37 құжатқа қол қойылды. Келісімдер транзит, сауда, цифрландыру және қауіпсіздікті қамтиды.
Қазақстан мен Пәкістан арасындағы ынтымақтастық жаңа деңгейге көтерілді. Мемлекет басшысы Қасым-Жомарт Тоқаев пен Пәкістан Премьер-министрінің қатысуымен екі ел арасында жалпы саны 37 құжаттан тұратын ауқымды келісімдер топтамасы бекітілді, деп хабарлайды Qazaqtoday ақпарат агенттігі.
Бұл стратегиялық маңызы зор құжаттар экономиканың негізгі салаларын түгелдей қамтиды. Атап айтқанда, тараптар транзиттік сауда, көлік, кедендік бақылау және логистика салаларындағы ықпалдастықты күшейтуге уағдаласты. Бұл қадам Қазақстанның транзиттік әлеуетін арттырып, оңтүстіктегі теңіз порттарына жаңа сауда жолдарын ашуға мүмкіндік береді.
Экономикалық байланыстардан бөлек, қауіпсіздік саласында да маңызды келісімдер жасалды. Екі ел қылмыскерлерді экстрадициялау туралы шартқа және БҰҰ бітімгерлік миссиялары аясында бірлесіп жұмыс істеу туралы меморандумға қол қойды. Бұл аймақтық тұрақтылықты нығайтуға бағытталған бірлескен қадам болып отыр.
Сондай-ақ заманауи технологиялар саласындағы серіктестікке ерекше назар аударылды. Қазақстан мен Пәкістан жасанды интеллект, цифрландыру және цифрлық активтер нарығын реттеу бойынша тәжірибе алмасуға келісті. Бұдан бөлек, денсаулық сақтау, білім, экология және мәдениет салаларын дамытуды көздейтін бірқатар меморандум бекітілді.
Бұл келісімдер Қазақстан мен Пәкістан арасындағы саяси-экономикалық және гуманитарлық байланыстардың тереңдей түскенін көрсетеді.
Фото: Ақорданың баспасөз қызметі
