Абай облысындағы колонияға түскен сотталушы бір күннен кейін көз жұмды

Абай облысындағы қатаң режимдегі колонияда 38 жастағы сотталушының қайтыс болуына қатысты екі түрлі ақпарат тарады. Әлеуметтік желіде оны ұрып-соқты делінсе, ресми орган мұны жоққа шығарды, деп хабарлайды Qazaqtoday ақпарат агенттігі.

Әлеуметтік желіде тараған ақпаратқа сәйкес, Жандос Б. есімді азаматты колония қызметкерлері мен әкімшілікке жұмыс істейтін басқа сотталушылар ұрып өлтірген. Марқұмның бұл мекемеге 28 қаңтарда жеткізіліп, арада бір күн өткенде, яғни 29 қаңтарда денесі мәйітханаға түскені айтылады.

Алайда Қылмыстық-атқару жүйесі комитеті (ҚАЖК) бұл ақпаратты растамады. Ведомствоның ресми мәліметі бойынша, қатаң режимдегі мекемеде бір камерада отырған екі сотталушының арасында жанжал шыққан. Соның салдарынан біреуі екіншісіне ауыр дене жарақатын салып, жәбірленуші оқиға орнында көз жұмған.

Аталған дерек бойынша «Адам өлтіру» бабымен қылмыстық іс қозғалды. Күдікті уақытша ұстау изоляторына қамалды.

«Қазіргі уақытта тергеу және тексеру жұмыстары жүргізіліп жатыр. Мекемедегі жағдай тұрақты. Тергеу барысын ҚАЖК басшылығы өз бақылауына алды», — деп хабарлады комитет өкілдері.

Фото: Әлеуметтік желіден