ЕО Иран сақшылар корпусын «лаңкес» деп таныды: Тегеран АҚШ-ты айыптады

Еуропалық Одақ Сыртқы істер министрлері Иранның Ислам революциясы сақшылар корпусын (ИРСК) лаңкестік ұйымдардың тізіміне енгізді, деп хабарлайды Qazaqtoday ақпарат агенттігі.

Еуропалық дипломатияның ықпалды өкілдерінің бірі Кайя Каллас бұл қадам Иран билігінің өз халқына қарсы жүргізіп жатқан қуғын-сүргініне тікелей жауап екенін атап өтті.

«Биліктің өз халқына жасаған репрессиясы жауапсыз қалмауы керек. Мұндай әрекеттер режимді күйреуге алып келеді», — деді ол.

Ресми Тегеран бұл шешімді саяси астары бар деп атап, Еуроодақты АҚШ пен Израильдің сойылын соғып отыр деп айыптады.

Сарапшылардың пікірінше, Брюссельдің бұл қадамы тараптар арасындағы қарым-қатынасты одан әрі ушықтырып, Ирандағы наразылықтар мен ядролық келісім төңірегіндегі диалогты қиындатуы мүмкін.

Фото: Әлеуметтік желіден