«OrdaMed» АҚ басқарма төрағасы Еркін Ділімбетовке іздеу жарияланды. Бұл туралы мәлімет Бас прокуратураның құқықтық статистика және арнайы есепке алу органдарының порталында пайда болды, деп хабарлайды Qazaqtoday ақпарат агенттігі.
Ресми дерекке сәйкес, іздеу ісі 28 қаңтарда Астана қаласында тіркелген. Бұған Ұлттық қауіпсіздік комитеті бастамашы болған. Қазіргі таңда іздеу шараларын ҰҚК-нің Сыбайлас жемқорлыққа қарсы іс-қимыл қызметі жүргізіп жатыр.
Бұған дейін ҰҚК «OrdaMed» компаниясының басшылығына қатысты тергеу басталғанын хабарлаған еді. Арнайы қызметтің мәліметінше, компания Қазақстанда өз өндірісі бары туралы жалған құжаттарды пайдаланған. Осы арқылы мемлекеттік емдеу мекемелеріне 28 түрлі медициналық жабдықты жеңілдікпен жеткізу кезінде заңсыз артықшылықтарға ие болған.
ҰҚК мәлімдеуінше, компания шын мәнінде дайын өнімді шетелден жеткізіп отырған. Мемлекетке келтірілген шығын көлемі 4,5 миллиард теңгеге бағаланды.
Фото: Әлеуметтік желіден
