Қазақстанда мектеп оқушыларына фермерлік істің негіздерін оқыту үшін арнайы агросыныптар ашу жоспарланып отыр. Пилоттық жоба алғашқы кезеңде еліміздің үш облысында іске қосылады, деп хабарлайды Qazaqtoday ақпарат агенттігі.
Бұл бастаманың негізгі мақсаты – жастарды ауыл шаруашылығы саласына тарту және болашақ білікті мамандарды мектеп қабырғасынан бастап дайындау. Осы мақсатта Ауыл шаруашылығы министрлігі жаңа жобаны таныстырды.
«Агросыныптар колледждермен, жоғары оқу орындарымен және жұмыс берушілермен тығыз байланыста құрылады. Оқушылар теориялық біліммен қатар, агросектордағы практикалық дағдыларды да меңгеретін болады», — деп хабарлады ведомство.
Алғашқы агросыныптар Ақмола, Солтүстік Қазақстан және Қостанай облыстарында ашылады. Бұл өңірлер еліміздің негізгі аграрлық аймақтары болып саналады.
Жоба 2026-2030 жылдарға арналған Мал шаруашылығын дамытудың кешенді жоспары аясында жүзеге асырылады. Жоспарда сондай-ақ агросала қызметкерлеріне қолдау көрсету және білім беру гранттарын бөлу шаралары да қарастырылған.
Фото: Әлеуметтік желіден
