Қырғызстандағы мектеп асханасы: Әкім шенеуніктерге бұзылған тамақты жегізді

Қырғызстанның Ош қаласының әкімі мектеп асханасындағы тамақтың сапасын тексеріп, оқушыларға арналған бұзылған асты жауапты қызметкерлердің өздеріне жегізді, деп хабарлайды Qazaqtoday ақпарат агенттігі.

Қала басшысы Жеңісбек Тоқторбаев «Жетіген» жалпы білім беретін мектебіне арнайы барып, асханадағы жағдаймен танысқан. Тексеріс барысында ол оқушыларға берілетін тағамның сапасы сын көтермейтінін анықтады. Атап айтқанда, нанның тастай қатып қалғанын, ал самсаның талапқа сай еместігін көрген.

Осыдан кейін әкім мектеп басшылығы мен асхана қызметкерлерін жинап, сапасыз тамақты олардың өздеріне жеуді талап еткен.

«Бұл ұят емес пе? Мынаған қараңыздаршы, нан тас болып қалған. Осыны үйге апарып, өз балаңызға беріп көріңіз. Екі тістеп те жей алмайды. Самсаны осындай күйде ұсынасыздар ма? Мұны мұғалімдердің өзі де жемейді. Мектептегі тамаққа қалай осылай немқұрайлы қарауға болады?» – деді қала басшысы.

Жеңісбек Тоқторбаев мектептегі тамақ сапасын ретке келтіруді қатаң тапсырып, бұл мәселені жеке бақылауына алатынын мәлімдеді.

Фото: Әлеуметтік желіден