НАТО бас хатшысы Ресейдің шығынын жариялады: Айына 30 мың сарбаз қаза тапты

НАТО-ның бас хатшысы Марк Рютте Давостағы Дүниежүзілік экономикалық форумда Ресейдің Украинадағы шығыны туралы мәліметті жариялады. Оның сөзінше, Ресей желтоқсан айында күн сайын мыңға жуық сарбазынан айырылып отырған, деп хабарлайды Qazaqtoday ақпарат агенттігі.

«Иә, бұл рас, желтоқсан айында ресейліктер күн сайын мың адамынан айырылды. Бұл – ауыр жараланғандар емес, нақты қаза тапқандар. Бір айдың ішінде 30 мыңнан астам адам», — деді Рютте.

НАТО бас хатшысы бұл деректерді еуропалық саясаттың басымдықтарына арналған талқылау кезінде келтірді. Ол АҚШ президенті Дональд Трамптың талаптарына, әсіресе оның Гренландия туралы мәлімдемелеріне шамадан тыс назар аудару еуропалық елдерді Украинаға қолдау көрсету қажеттілігінен алшақтатып жатқанын атап өтті.

«Қазіргі басты мәселе – Гренландия емес, басты мәселе – Украина», — деп түйіндеді Рютте.

Ол осындай ауыр шығындарға қарамастан, Ресейдің Украинадағы шабуылдарын жалғастырып жатқанын қосты. Алайда Рютте бұл бағалауды қай дереккөзге сүйеніп жасағанын нақтыламады. Әдетте Батыс саясаткерлері мен барлау қызметтері ресейлік шығындар туралы айтқанда, қаза тапқандар мен жараланғандарды бірге есептейтін жалпы санды атайды.

Ресей тарапы 2022 жылдың қыркүйегінен бері өз шығындары туралы ресми мәлімет таратпады. Бұған дейін BBC Орыс қызметі мен «Медиазона» басылымы ашық дереккөздерге сүйеніп, қаза тапқан ресейлік әскерилердің аты-жөнін анықтап келеді. Олардың соңғы деректері Ресей шығындарының артқанын көрсеткенімен, соңғы айлардағы нақты сандар ақпараттың кешігіп жетуіне байланысты әлі толық емес.

Фото: World Economic Forum/Valeriano Di Domenico