Испанияның оңтүстігіндегі Кордова провинциясында екі жүрдек пойыз соқтығысып, кемінде 21 адам мерт болды, деп хабарлайды Qazaqtoday ақпарат агенттігі.
EFE ақпарат агенттігінің мәліметінше, апат Адамуз қаласында болған. Зардап шеккендердің саны әртүрлі дереккөзде 25-тен 100-ге дейін деп көрсетілуде.
Алдын ала мәлімет бойынша, алдымен Малагадан Мадридке бара жатқан пойыз рельстен шығып кетіп, қарсы бағыттағы жолға түскен. Дәл сол сәтте келе жатқан екінші пойыз оны соғып, ол да рельстен шығып кеткен.
Апат орнынан түсірілген видеода кем дегенде бір вагонның аударылып қалғаны көрінеді. AFP агенттігі жолаушылардың бірінің сөзін келтірді.
«Соқтығысу күші жер сілкінісіне ұқсады», – дейді куәгер.
Екі пойызда жалпы саны 400-ге жуық адам болуы мүмкін екені айтылады. Қазір бұл учаскеде пойыздардың қозғалысы тоқтатылды. «Түсіп жатқан ақпарат өте күрделі», – деп жазды Испанияның көлік министрі Оскар Пуэнте Х әлеуметтік желісінде.
