World Boxing: 4 сәуірде қазақстандық бес боксшы шаршы алаңға шығады

Фото: Instagram/boxingkazakhstan

World Boxing аясында өтетін әлем кубогының бірінші кезеңінде 4 сәуірде жартылай финалда қазақстандық 5 боксшы шаршы алаңға шығады, деп хабарлайды Qazaq Today ақпарат порталы. 

Ел құрамасынан бүгін Нұрсұлтан Алтынбек (55 келі), Диас Молжігітов (75 келі), Жазира Орақбаева (51 келі), Ұлжан Сәрсенбек (57 келі), Дәулет Төлемісов (85 келі) сайысқа түседі.

Ал Даниял Сапарбай (90 келіден жоғары) қола жүлдегер атанды. Ол жартылай финалда өзбекстандық Жахонгир Зокировқа 0:5 есебімен жол берді.

Қазірге дейін ел құрамасынан Нұрзат Оңғаров (50 келі), Талғат Сырымбетов (60 келі), Анита Әдішева (54 келі), Алмат Әбдуали (65 келі), Дархан Дүйсебай (70 келі) жарыс жолынан шығып қалды.

World Boxing турнирі үш кезеңнен тұрады. Екінші кезең 30 маусым — 7 шілде аралығында Қазақстанда болады. Ал үшінші кезең 21-27 шілде аралығында өтеді. Бірақ оның өтетін орны әзірге белгісіз.