Кезек үшін жанжал: Семей тұрғыны жүкті әйелге күш қолданған

Фото: Pixabay

Семей қаласындағы емханалардың бірінде кезекке байланысты жанжал шығып, жүкті әйел зардап шекті. Оқиға орнында түсірілген бейнежазба әлеуметтік желілерде кеңінен тарады, деп хабарлайды Qazaq Today ақпарат порталы.

Жәбірленуші әйелдің айтуынша, ол дәрігер қабылдауына кіруге дайындалып тұрған кезде белгісіз ер адам кезексіз өтуге әрекет жасаған. Алдымен сабыр сақтаған әйел болашақ сәбиінің амандығын ойлап, жанжалға бармаған. Алайда ер адам оны балағаттап, арандатуды жалғастырған.

Әйел болған жағдайды тіркеу үшін телефон камерасын қосқан сәтте, ер адам оған жүгіріп келіп, қолын қайырып, ұялы телефонын тартып алған. Қақтығыс тек медицина қызметкерлері араласқаннан кейін ғана тоқтатылған.

Зардап шеккен жүкті әйел полиция шақырып, ресми арыз жазған. Алайда оның сөзінше, құқық қорғау органдары ер адамға қатысты тек түсіндіру жұмыстарымен шектелген.