Желтоқсанда не қымбаттады: Ет, бензин және Дубай демалысы шарықтады
Қазақстанда желтоқсанда азық-түлік пен қызмет бағасы күрт өсті. Ең көп қымбаттаған — сиыр еті, алтын бұйымдар және Дубайға саяхат.
Фото: pexels.com
Қазақстанда желтоқсан айында жылдық инфляция 12,3%-ға жетті. Бағаның айлық өсімі 0,9%-ды құрады, деп хабарлайды Qazaqtoday ақпарат агенттігі.
Қымбаттаған азық-түліктер
Ең көп қымбаттаған өнім — сиыр еті. Оның бағасы былтырғымен салыстырғанда 32,1%-ға өскен. Одан кейін қой еті — 28,8%, шұжық — 19,3%, алма — 18,4%, күнбағыс майы — 17,5%-ға артқан.
Киім-кешек пен қызмет көрсетудегі өсім
Азық-түлікке қоса, тауарлар мен қызметтер де айтарлықтай қымбаттап жатыр. Мәселен, алтын, күміс бұйымдар 38,2%-ға, бензин — 15,7%-ға, киім — 10,5%-ға өскен. Пәтер жалдау ақысы 14,8%-ға артқан. Сұйытылған газ бағасы бірден 23,2%-ға көтерілген.
Сондай-ақ, шетелге шыққысы келетіндер үшін Дубайда демалу құны 48%-ға көбейген.
Баға өсімі аясында бірден-бір арзандаған қызмет — суық су. Оның бағасы жыл ішінде 7,1%-ға төмендеген.
Сарапшылар табыс өсімі инфляция деңгейінен қалып келе жатқанын атап өтуде. Бұл жағдай халықтың нақты кірісін төмендетіп отыр.
