Уәдесін орындамайтын ауыл басшысын қызметінен босату қажет – Қасым-Жомарт Тоқаев
Фото: Ақорда
Президент ондай әкімдер «халықтың талабымен немесе саяси партиялардың ұсынысымен жұмыстан шығарылуы тиіс» деп есептейді. Ол үшін Мемлекет басшысы ең бірінші заңға жауапкершілік енгізу керек екенін айтты, деп хабарлайды Qazaq Today ақпарат порталы.
– Жергілікті мемлекеттік басқару және өзін-өзі басқару туралы» Заңда әкімнің сайлаушылар алдындағы жауапкершілігін нақтылайтын норма жоқ. Бұл – дұрыс емес.
Әкімдер тұрғындарға сайлау алдындағы бағдарламасының орындалуы туралы жиі есеп беріп тұруға тиіс. Мұны заңмен бекіту керек.
Уәдесін орындамайтын, міндетін дұрыс атқармайтын ауыл басшысын қызметінен босату тетіктері қарастырылуы қажет. Ондай әкімдер халықтың талабымен немесе саяси партиялардың ұсынысымен жұмыстан шығарылуға тиіс, – деді Қасым-Жомарт Тоқаев.
Президент пікірінше, сонда әкім болуға үміткерлер де елге экономикалық негізі жоқ құрғақ уәде бере алмайды. Мұндай жалаң сөздер, яғни популистік әрекеттер халықтың ауыл әкімдеріне, тіпті тұтас сайлау институтына деген сенімін азайтуы мүмкін.
– Үкімет әкімдердің сайлау алдындағы бағдарламасының экономикалық бөлігіне қойылатын талаптарды айқындауы керек. Сапалы дайындалған бағдарламаны аймақтың даму жоспарымен үйлестіруге болады. Жалпы, осындай шаралар әкімдердің есептілігін күшейтеді. Сондай-ақ өз үміткерлерін ұсынған партиялардың жауапкершілігін арттырады, – деп қоса кетті Мемлекет басшысы.
