Қазақстанда 10 арнайы операция: ҰҚК 15 адамды, оның ішінде шетелдіктерді ұстады

Фото: ҰҚК баспасөз қызметі

Ұлттық қауіпсіздік комитеті (ҰҚК) қазан айынан бері есірткінің заңсыз айналымына қарсы күрес аясында 10 жедел операция өткізгенін хабарлады.

Ведомствоның баспасөз қызметінің мәліметінше, бұл операциялар есірткі, психотроптық заттар мен прекурсорлардың заңсыз айналымының жолын кесуге бағытталған.

Операция нәтижелері

Жүргізілген іс-шаралардың қорытындысы бойынша:

• Есірткі жеткізетін 3 халықаралық және 3 аймақтық арна жойылды;

• Бір астыртын есірткі зертханасы мен есірткі плантациясының қызметі тоқтатылды.

622 кг есірткі тәркіленді

Заңсыз айналымнан 622 килограмм есірткі, оның ішінде психотроптық заттар, гашиш және марихуана тәркіленді.

«Осы құқық бұзушылықтарды жасады деген күдікпен соттың санкциясымен Қазақстанның 12 азаматы мен 3 шетелдік азамат қамауға алынды», — деп хабарлады ҰҚК өкілдері.

Қазіргі уақытта сотқа дейінгі тергеу амалдары жүргізілуде.

Комитет Қылмыстық-процестік кодекстің 201-бабына сәйкес өзге ақпарат жария етуге жатпайтынын еске салды.