Таразда талтүсте қыз алып қашқандар ұсталды
Фото: видеодан скрин
Тергеу процесі Ішкі істер министрлігінің (ІІМ) ерекше бақылауында, деп жазады Qazaq Today ақпарат порталы.
ІІМ-нің ресми өкілі Шыңғыс Алекешевтің мәліметінше, Таразда қызды ұрлады деген күдікпен үш адам ұсталып, уақытша ұстау изоляторына жеткізілді.
Деректерге сәйкес, тергеу Қылмыстық кодекстің 125-1-бабы («Неке қиюға мәжбүрлеу») бойынша жүргізілуде. 2025 жылдың қыркүйегінен бастап, бұл әрекет ресми түрде қылмыс санатына енгізілген. Аталған бап бойынша жаза ретінде 2000 айлық есептік көрсеткіш (2025 жылы шамамен 7,9 млн теңге) дейін айыппұл салу немесе екі жылға дейін бас бостандығынан айыру қарастырылған. Егер іс ауыр зардаптарға немесе ауырлататын мән-жайларға ие болса, жаза мерзімі 5 жылдан 10 жылға дейін жетуі мүмкін.
«Үш күдікті ұсталып, уақытша ұстау изоляторына қамалды. Тергеу барысы ІІМ басшылығының ерекше бақылауында. Барлық кінәлі заңға сәйкес қатаң жауапқа тартылады», – деді Жамбыл облысындағы оқиғаға қатысты түсініктеме берген Шыңғыс Алекешев.
Министрлік өкілі жаңа норма бойынша түсіндіру жұмыстарының белсенді жүргізіліп жатқанын атап өтті.
«Ішкі істер органдары неке қиюға мәжбүрлеу және азаматтардың жеке бас бостандығына қарсы кез келген әрекеттердің алдын алу үшін қатаң шаралар қабылдайды. Жаза бұлтартпастығы қағидасы толық қамтамасыз етіледі», – деді ол.
