Танымал блогер алматылықтарды таудағы қоқыс үшін ұялтты
Фото: Видеодан скрин
Әлеуметтік желіде блогер Александр Зубарев (интернетте Zubarefff атымен танымал) Алматы тауларында жиналған қоқысты көрсетіп, оны тастағандарға ашық түрде наразылық білдірген видео жариялады.
Бейнежазбада ол табиғи аймақта қалған қоқысты камераға көрсетіп, оны тастағандарды өткір әрі тұрпайы сөздермен сынайды.
«Мен осыны қорық аумағында қалдырған әр адамға айтарым – сіздің үйіңізге де адамдар келіп, дәл солай істесін. Сол ғана», – деді Зубарев.
Александр Зубарев — Донецктен шыққан танымал блогер, стример және хореограф. 2015 жылдан бері Қытайда тұрады. 2021 жылы TikTok-та видео жариялап, әсіресе қытай тағамдары, оның ішінде пельмень туралы роликтері арқылы танымал болды. Қазір платформада оның 8,5 миллионнан астам жазылушысы бар.
Бұған дейін Зубаревтің Қазақстанға келгені белгілі болды. Ол түсірген видеолардың бірінде елдің тау ауасының өзін «жасартып жібергенін» әзілмен айтқан. 2024 жылы Астанада блогер өнеркәсіптік альпинистің биікте қауіпті жұмысын түсіріп, селфи жасап, оған ризашылығын білдірген болатын.
