«Қазақфильм» төңірегіндегі қауесеттерге нүкте қойылды – Аида Балаева

Фото: Қазақфильм

Мәдениет және ақпарат министрі Аида Балаева қоғамда қызу талқыланып жатқан «Қазақфильм» киностудиясының болашағына қатысты ресми мәлімдеме жасады, деп хабарлайды Qazaq.today ақпараттық агенттігі.

    «Қазақфильм» жері сатылған жоқ

Министрдің айтуынша, студияға тиесілі жерлер ешкімге сатылмайды және тек киноөндіріс мүддесіне пайдаланылады. Ол бұл тақырыптағы қауесеттерді тоқтатуға шақырды.

Инвесторлар туралы әңгіме көп, бірақ нақты ұсыныс жоқ. Қоғамда киностудияға қомақты қаржы салуға дайын инвесторлар бар деген ақпарат тарап жатыр. Алайда, министрлікке ешқандай кепілдік хат немесе нақты ұсыныс келіп түспеген.

 «Қазақфильм» Астанаға көшпейді

Балаева киностудияны Астанаға көшіру туралы ақпараттың шындыққа жанаспайтынын айтты. Тек «Қазақанимация» шығармашылық бірлестігін елордаға орналастыру қарастырылып жатыр, бірақ бұл өндірістік база емес, тек анимациялық жобаларға тапсырыс беретін құрылым.

    Кино саласына қолдау артады

Министрдің мәліметінше, елімізде түсірілетін фильмдерге бөлінетін қаржының кемінде 30%-ы «Қазақфильмге» бағытталатын болады. Бұл киностудияның қаржылық тұрақтылығы мен тиімділігін арттыруға мүмкіндік береді.

      Шетелдік әріптестермен жұмыс жанданады

Киностудия қазақстандық киноны әлемдік нарыққа шығару үшін халықаралық серіктестермен бірлесіп бірқатар фильм түсіруді жоспарлап отыр. Сонымен қатар, «Қазақфильм» соңғы 15 жылда алғаш рет жөндеу жұмыстарына кірісті.

     «Қазақфильм» – мәдени мұра, бірақ бизнес ретінде дамуы тиіс

Аида Балаева студияны кәсіби кинематографистер емес, тиімді басқаруды білетін мықты менеджер басқаратынын баса айтты. Министрлік киностудияның тұрақты дамуын қамтамасыз ету үшін жан-жақты қолдау көрсететінін мәлімдеді.