25 мәйіт табылды: Бангкокта оқушылар мұғалімдерімен бірге автобуста тірідей жанып кетті
Таиландта мұғалімдер мен оқушылар мінген екі қабатты автобус өртеніп кетті. Соның салдарынан 20-дан аса адам қаза тапты, деп хабарлайды Qazaq.today.
Белгілі болғаны, Бангкоктың шетінде оқушылар мен мұғалімдер мінген мектеп автобусы экскурсия кезінде өртеніп кеткен. Онда 38 бала мен 6 мұғалім болған. Болжам бойынша, 44 адамның 25-і көз жұмған. Көлік министрі Сурья Хуангроонгруангкиттің айтуынша, тағы 16 бала мен 3 мұғалім ауруханаға жеткізілген.
Өртенген автобус табиғи газбен жүретін көлік түрі екен. Қазір өрттің шығу себебі анықталып жатыр.
— Мұғалімдер өрттің тез басталғанын айтты. Кейбір оқушы терезеден шығып, аман қалған. Қазір барлығын тексеріп жатырмыз, тіпті автобус компаниясының салғырттығы болуы мүмкін деген болжам бар, – дейді полиция бастығының міндетін атқарушы Киттират Фан Пхет.
