Аймақ 17 шілде · 1 мин оқу

«Соңғы рет өзбекстандық жігітімен сөйлескен»: Алматы облысында 16 жастағы қыз үш күннен бері табылмай жатыр

Фото: Айкүмістің әпкесі Айданадан

Алматы облысында 16 жастағы жасөсіпірім қыз үш күннен бері табылмай жатыр. Ол дүкенге балмұздақ әкелемін деп шыққаннан із-түссіз жоғалған. Жақындары кейіннен оның өзбекстандық жігіті болғанын және соңғы рет сол адаммен байланысқа шыққанын жеткізді. Алайда полицейлер қызды әлі іздестіріп жатыр, деп хабарлайды Qazaq Today ақпарат агенттігі.

Жоғалған жасөспірім Айкүміс Қуатбектің әпкесі Айдана сіңлісінің жағдайына алаңдаулы. Айтуынша үш күннен бері қыздан еш хабар жоқ, деп жазады Stan.kz.

“14 шілде күні дүкенге балмұздақ алып келемін деп шығып кеткен. Содан оны ешкім көрмепті. Достарынан да сұрап көрдік. Жоғалғаннан кейін 2 сағаттан соң полицияға хабарластық. Кейін оның өзбекстандық жігіті болғанын білдік. Алайда ол жігітті танымаймыз да. Соңғы рет сол жігітпен сөйлескен. Егер алып қашқан болса, ендігі хабар бермейтін бе еді? Әлі табылмай жатыр, алаңдап отырмыз”, – деді әпкесі Айдана.

Айкүміс 14 шілде күні сағат 17:00-дерде Еңбекшіқазақ ауданы, Қырбалтабай ауылындағы Әубәкіров 13 көшесіндегі үйінен шығып кеткен.

Жеке белгілері: Бойы 155-160 см, дене бітімі толықтау, шашы қара, иығынан асады, көзі қоңыр. Қыздың үстінде қара сұрғылт жейде мен қара шалбар болған.