Екібастұздағы көмір кенішінде конвейер өртенді
Оқиға «Еуроазиаттық энергетикалық корпорациясына» қарайтын «Шығыс» кенішінде болған. Тілсіз жауды сөндіруге 3 арнайы техника мен 12 адам жұмылдырылды, деп хабарлайды Qazaq Today ақпарат порталы.
Өңірлік төтенше жағдайлар департаментінен хабарлағандай, Екібастұздың «Шығыс» көмір кенішінде көтергіш конвейердің таспасы өртенген.
«Өрт № 2 кен шығару учаскесінде, көмірді сыртқа беріп тұратын конвейердің екі жерінде шыққан. Оқиға орнында кәсіби әскерилендірілген авариялық-құтқару қызметінің үш техникасы мен жеке құрамнан 12 адам жұмылдырылды. Сондай-ақ, кеніштің екі су тасығыш көлігі, ерікті өрт сөндіру жасағы жіберілді. Жалын толықтай өшірілді. Зардап шеккендер жоқ», — деп мәлімдеді департаменттен.
Тілсіз жаудың шығу себептері анықталып жатыр.
Фото: ТЖМ
