Отырарда оқушылар бәліш сатып, жиналған ақшаны Орал қаласына жіберді

Фото: Көкмардан мектебі

Отырар ауданындағы Көкмардан жалпы орта мектебінің бастауыш сынып оқушылары су тасқынынан зардап шеккен аймақтарға қаржылай көмек берді, деп жазады Qazaq Today ақпарат агенттігі kaz.inform.kz-ке сілтеме жасап.

«Су – тіршілік көзі» атты ашық сабақ өткен бастауыш сынып мұғалімі Қызайым Алтынбекова тақырыпты еліміздегі су тасқынмен байланыстырған. Зардап шеккен халыққа ел болып көмек беріліп жатқанын айтып, сабақты кең көлемді талқылап, түсіндірген. Күнделікті өмірді күрделі тақырыппен ұштастыра білген оқытушының сабағына белсенді қатысқан оқушылар да су тасқынынан зардап шеккен аймақтарға көмек бергілері келетіндігін айтқан. Содан ертеңіне ата-аналарының көмегімен тәттілер пісіріп алып келген. Үлкен үзілісте акция ұйымдастырып, бәліш пен тәттілерді сатқан. Ал түскен қаржы аз болса да, Орал қаласына көмек ретінде аударылды. Ауылымыздың тұрғындары су тасқынынан зардап шеккен аймақтарға гуманитарлық көмек жіберді. Бұл іске мектебіміздің ұстаздары да өз үлесін қосты. Игі іске оқушыларымыз да атсалысып жатыр. Бұл елдегі жағдайға бүлдіршіндеріміздің де бейжай қарамағандығын көрсетіп отыр. Жиналған қаржы аз болса да, кең көңіл үшін оқушыларымызға айтар алғысым шексіз» — дейді Көкмардан мектебінің директоры Бимен Мырзаш.