СҚО-да білім бөлімінің басшысы пара алды деген күдікке ілінді
Солтүстік Қазақстан облысы бойынша Сыбайлас жемқорлыққа қарсы қызмет Тимирязев ауданы білім бөлімінің басшысына қатысты сотқа дейінгі тергеу жүргізіп жатыр, деп хабарлайды Qazaq.today агенттігі.
«Лауазымды тұлға делдал арқылы мердігер ұйым өкілінен 1,2 млн теңге мөлшерінде пара алды деген күдікке ілінді. Заңсыз сыйақы екі мектепті күрделі жөндеу бойынша орындалған жұмыстар актілеріне кедергісіз қол қою үшін арналған», – делінген Антикор хабарламасында.
Соттың санкциясымен күдіктілер қамауға алынды.
Сотқа дейінгі тергеу жалғасып жатыр.
Қылмыстық-процестік кодексінің 201-бабына сәйкес өзге ақпарат жария етуге жатпайды.
