«Ішуге жарамсыз: Шымкентте қауіпті жасанды энергетикалық сусындарды шығарумен айналысқандар ұсталды
Шымкентте адам өміріне қауіпті жасанды энергетикалық сусындарды шығарумен айналысқандар ұсталды. Күдіктілерді тінту кезінде, қоймадан 21 мың дана дайын өнім мен 54 мың құты тәркіленген, деп хабарлайды Qazaq.today ақпараттық агенттігі. Адам өміріне қауіпті сусындарды шығарып стаумен айналысқандар бизнес құқықтарын қорғау және көлеңкелі экономикамен күрес бойынша жүргізіліп жатқан жұмыс аясында анықталған. күдіктілер қалалық санитарлық-эпидемиологиялық бақылау департаментінің мамандарымен және сауда маркасының құқық иеленушінің өкілдерімен жүргізілген жедел-іздестіру іс-шаралары барысында ұсталған.
«21 мыңнан астам құты контрафактілік сусынның дайын өнімдері, тауар белгісі бар 54 мың данадан астам бос банкалар энергетикалық сусынды құюға арналған жабдық, сия бүріккіш жапсырма, орау құрылғылары, қақпақтар, құрғақ қоспалар (лимон қышқылы, кофеин, сода, бояғыштар, қант, қышқылдықты реттегіштер) тәркіленді.Келтірілген шығын көлемі 37 млн теңгеден асады. Қауіпті сусынды ҚМА Шымкент қаласы бойынша департаменті тоқтатты», — делінген хабарламада.
Ұлттық сараптама орталығының микробиологиялық зерттеу хаттамасына сәйкес, тәркіленген сусынның құрамында рұқсат етілген мөлшерден екі есе жоғары зең мен ашытқы бар. Бұл өнім тұтынуға жарамсыз, өйткені ол адам денсаулығына, әсіресе жас ағзаға өте зиянды.
«Аталған факті бойынша сотқа дейінгі тергеу басталды. Тергеу мүддесіндегі басқа ақпарат жария етілмейді.ҚР Конституциясының 77-бабының 3-тармағының 1-тармақшасына және ҚР Қылмыстық-процестік кодексінің 19-бабының 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әркім кінәсіз деп есептеледі», — деді ҚР ҚМА Баспасөз қызметі.
