Астанада балабақшада 1,5 жасар сәби ыстық сорпаға күйіп қалды
Астанадағы балабақшада 1,5 жасар сәби ыстық сорпаға күйіп, денесінің 10 пайызын күйік шалды. Анасының арызы бойынша қылмыстық іс қозғалып, тергеу жүріп жатыр.
Сурет: pixabay.com
Астанадағы балабақшалардың бірінде 1,5 жасар сәби ыстық сорпаға күйіп, денесінің 10 пайызын күйік шалды. Оқиға 2 қазанда болған. Бұл туралы ақпарат Astanovka 98 Telegram арнасында жарияланды.
Бұл туралы Qazaqtoday.info сайты хабарлайды.
Сәбидің анасының айтуынша, жазатайым оқиға салдарынан баласының денесінің 10 пайызы күйікке ұшыраған. Қазіргі уақытта бүлдіршін үй жағдайында ем қабылдап жатыр.
Анасы балабақша әкімшілігінің әрекетіне наразылық білдірген. Оның сөзінше, мекеме өкілдері оқиғаның өздеріне қатысы бар екенін мойындамай, бейнебақылау камераларына түсіп қалған жазбаларды бермеген.
«Сәбидің анасының айтуынша, балабақша бейнебақылау камераларына түскен жазбаны бермей отыр және болған оқиғаның өздеріне қатысын жоққа шығаруда. Ол полиция мен мемлекеттік органдарға арызданған», – делінген Telegram арнасындағы хабарламада.
Осы жағдайдан кейін баланың анасы құқық қорғау органдарына арыз түсіріп, оқиғаның мән-жайын анықтауды сұраған. Астана қалалық полиция департаменті аталған дерек бойынша қылмыстық іс қозғалғанын растады. Полицияның мәліметінше, іс балабақша қызметкерінің кәмелетке толмаған баланың қауіпсіздігін қамтамасыз ету жөніндегі міндеттерін тиісінше орындамауы фактісі бойынша тергеліп жатыр.
«Балабақша қызметкерінің кәмелетке толмаған баланың қауіпсіздігін қамтамасыз ету жөніндегі міндеттерін тиісінше орындамауы фактісі бойынша қылмыстық іс қозғалды. Сотқа дейінгі тергеу шеңберінде бейнебақылау камераларының жазбалары тәркіленді. Олар зерттеліп жатыр», – деп хабарлады полиция департаменті.
Құқық қорғау органдары балабақшадағы бейнебақылау камераларының жазбаларын алып, тексеруге кіріскен. Тергеу барысында баланың қандай жағдайда күйік алғаны және оған жауапты қызметкерлердің әрекеті анықталмақ. Қазіргі уақытта оқиғаның барлық мән-жайын анықтауға бағытталған тергеу амалдары жүргізіліп жатыр. Әзірге балабақша қызметкерлерінің кінәсі сот тәртібімен анықталған жоқ.
