Сабина Алтынбекова волейболдағы тәртіпсіздікке қарсы шықты
Сабина Алтынбекова Павлодарда жас спортшыны ұрған жаттықтырушының әрекетін айыптап, волейболда реформа жасауға шақырды. Оқиғаға қатысты тергеу жүріп жатыр.
Фото: instagram.com/altynbekova_20
Павлодарда өткен жарыста жас спортшыны ұрған жаттықтырушының әрекетіне белгілі қазақстандық волейболшы Сабина Алтынбекова қатты наразылық білдірді. Ол отандық волейболда ауқымды реформа жүргізу қажеттігін айтты.
Бұл туралы Qazaqtoday.info сайты хабарлайды.
Балалар мен жасөспірімдер жарысында тәлімгер өз шәкіртіне матч кезінде физикалық күш қолданған оқиға резонанс тудырды. Сабина Алтынбекова бұған жауап ретінде мұндай әдістердің спортта мүлдем жол берілмейтінін атап өтті.
«Физикалық зорлық-зомбылық та, психологиялық зорлық-зомбылық та, мысалы, буллинг те жол берілмейді. Жаттықтырушыларды мұқият тексеру, оның ішінде олардың мінез-құлқы мен жұмыс әдістерін бағалау қажет. Өкінішке қарай, волейболда кейбір жаттықтырушылар тарапынан қарапайым мінез-құлық мәдениеті жетіспейді», — деп жазды спортшы өзінің Instagram парақшасында.
Волейболшының пікірінше, қалыптасқан жағдай жас спортшылармен жұмысты ұйымдастырудағы жүйелік мәселелерді ашты. Алтынбекова профильдік федерацияны кадрларды іріктеуге және командаларды қажетті мамандармен қамтамасыз етуге ерекше назар аударуға шақырды.
«Менің ойымша, федерация әр жаттықтырушыны мұқият тексеруі керек. Көптеген командаларда дәрігер жоқ, психолог туралы айтпағанның өзінде. Бұл жағдай жүйені тұтастай қайта қарауға уақыт келгенін айқын көрсетеді!» — деп қорытындылады ол.
Скандалды оқиға қоғам мен жанкүйерлер арасында кең талқылау тудырып, балалар мен жасөспірімдер спортындағы қауіпсіздік пен психологиялық ахуал мәселесін көтерді.
Еске салайық, оқиға 26 қазанда Павлодарда жеке клубтар арасындағы Қазақстан волейбол біріншілігі кезінде болған. Бейнежазбада Шымкент волейбол академиясының жаттықтырушысы Хамит Мырзабековтің кәмелетке толмаған шәкіртіне соққы бергені көрінеді. Қазақстан ұлттық волейбол федерациясының тәртіптік комитеті араласқаннан кейін тәлімгер екі жылға кез келген жаттықтырушылық және педагогикалық қызметпен айналысу құқығынан айырылып, дисквалификацияланды. Турнир өткізген ұйымдарға да сөгістер мен айыппұлдар салынды. Сонымен қатар Павлодар облысының полиция департаменті істі ерекше бақылауға алып, сотқа дейінгі тергеу бастады.
