Шымкентте 8 жасар қызға қатысты іс қайта қаралып, сот үкімі өзгертілді
Шымкентте 8 жасар қызға қатысты іс қайта қаралып, 56 жастағы ер адам 7,5 жылға сотталды. Бұған дейін ол 216 мың теңге айыппұл төлеп құтылған еді.
Сурет: newtimes.kz
Шымкентте 8 жасар қызға қатысты іс қайта қаралып, сот үкімі өзгертілді. Оқиға биылғы маусымда болған. Бейнебақылау камералары 56 жастағы ер адамның кішкентай қызды ашық түрде ұстап, сүйгенін түсіріп алған. Ол зардап шеккен қызды өзімен бірге алып кетуге әрекеттенген, алайда бала құтылып, қашып кеткен. Ер адамға 216 мың теңге айыппұл салынып, үйіне жіберілген.
Бұл туралы Qazaqtoday.info сайты хабарлайды.
КТК телеарнасының мәліметінше, үш айдан кейін іс қайта қаралды. Сотталушы жеті жарым жыл түрмеде отырады.
«Зардап шеккеннің пайдасына 3 миллион теңге моральдық зиян өндірілді. Сот үкімі заңды күшіне енген жоқ», — деп хабарлады Шымкент сотының баспасөз қызметі.
Бұған дейін Талғарда полиция сегіз жасар қызға қатысты азғындық әрекеттер фактісі бойынша қылмыстық істі тергеп жатқаны белгілі болды. Күдікті оқиғадан екі күн өткен соң ұсталған.
