Клиника мен дәрігердің біліктілігін қалай тексеруге болады

Фото: ИА «NewTimes.kz»

Медициналық көмектің қауіпсіздігі мен сапасын қамтамасыз ету мақсатында қазақстандықтарға емдеу мекемесіне жүгінер алдында клиниканың рұқсат құжаттары мен мамандардың сертификаттарын алдын ала тексеру ұсынылады. Бұл туралы Қазақстан Республикасы Денсаулық сақтау министрлігінің баспасөз қызметіне сілтеме жасай отырып, «NewTimes.kz» ақпарат агенттігі хабарлады.

Бұл туралы Qazaqtoday.info сайты хабарлайды.

Емдеу басталмай тұрып, пациенттерге медициналық ұйымның жұмысының негізгі шарттарын тексеру кеңес етіледі: медициналық қызметке қолданыстағы лицензияның болуы; лицензияға қосымшада қажетті медициналық көмек түрінің көрсетілуі; қызмет көрсетілетін нақты мекенжайдың рұқсат құжаттарындағы мекенжайға сәйкес келуі; қызметтердің құны, оларды көрсету шарттары, сондай-ақ ықтимал қарсы көрсетілімдер мен тәуекелдер. Кез келген медициналық ұйымның лицензиясын eLicense.kz мемлекеттік электрондық тізілімінен тексеруге болады.

Нақты маманды таңдаған кезде мына деректерді нақтылау қажет: бейіндік медициналық білімінің болуы; дәрігердің нақты мамандығы; клиникалық практикаға құқық беретін қолданыстағы маман сертификатының болуы.

Ведомство диагностика қою, талдауларды түсіндіру, дәрілерді тағайындау немесе тоқтату, сондай-ақ емдеу схемасын жасау медициналық қызметке жататынын атап өтті. Мұндай қызметтерді тек клиникалық практикаға жіберілген маман көрсетуге құқылы. Бұл ереже әлеуметтік желілер мен интернет арқылы кеңес беру кезінде де қатаң сақталады.

Егер пациентте дәрігердің біліктілігіне немесе қызмет сапасына күмән туындаса, мамандар шартты, түбіртектерді, тағайындауларды, медициналық қорытындыларды және барлық хат алмасуды сақтауды ұсынады. Дәрігерлердің немесе клиникалардың әрекеттеріне шағыммен Қазақстан Республикасы Денсаулық сақтау министрлігінің Медициналық және фармацевтикалық бақылау комитетінің аумақтық департаментіне, оның ішінде eOtinish платформасы арқылы жүгінуге болады.

Сондай-ақ оқыңыз: Код бар, кепілдік жоқ — Денсаулық сақтау министрлігі БАД-тарды енді қалай тексеру керектігін түсіндірді.

Қазақстан Республикасы Денсаулық сақтау министрлігінің медициналық бақылау комитетінің байланыстары: Call-орталық: +7 701 006 5900; Кеңсе: 8 (7172) 74-27-68; E-mail: kmfk@dsm.gov.kz; Ресми сайт: gov.kz.

Министрлік лицензиясыз немесе маман сертификатынсыз медициналық қызмет көрсету Қазақстан Республикасының заңнамасына сәйкес жауапкершілікке әкеп соғатынын еске салды.

Бұған дейін Денсаулық сақтау министрлігі елдегі босануға көмек көрсететін ұйымдарда жаппай тексерулер жүргізілгенін хабарлаған. Олардың нәтижелері бойынша Қазақстандағы тексерілген әрбір үшінші перзентхана медициналық құралдарды зарарсыздандыру ережелері мен санитарлық-эпидемиологиялық нормаларды бұзған.