Әйгерім Қалаубаева жаңа бейнебаянымен жұлдыздарға теңелді
Әнші Әйгерім Қалаубаева «Махаббатым – Машақатым» әніне жаңа бейнебаян түсіріп, желі қолданушылары оны Шакира мен Дженнифер Лопеске теңеді.
Сурет: ашық дереккөзден
Қазақстандық әнші Әйгерім Қалаубаева жаңа бейнебаянын ұсынып, көрермендерді ерекше образымен және биімен баурады. Әлеуметтік желі қолданушылары оны әлемдік жұлдыздар Шакира мен Дженнифер Лопеске теңеді.
Бұл туралы Qazaqtoday.info сайты хабарлайды.
Әнші «Махаббатым – Машақатым» әніне түсірілген бейнебаянды YouTube платформасында жариялады.
Әйгерім Қалаубаева Instagram парақшасында түсірілім алаңынан бірнеше кадр жариялады. Клипте ол көк джинс шорты, беліне түйілген жейде және гүлді өрнегі бар биік етік киіп шыққан.
Өнер иесінің ұзын бұйра шашы мен сахналық образы жанкүйерлерінің ерекше ықыласына бөленді. Желі қолданушылары әншінің жаңа стиліне түрлі пікір қалдырды.
«Қазақтың Шакирасы», «Жастардан қалыспайды», «Бұл ән міндетті түрде хит болады», «Жаңа образыңыз керемет жарасады», «Джей Ло секілді», – деп жазды оқырмандар.
Сонымен қатар тыңдармандар Әйгерім Қалаубаеваның биіне және жаңа әніне жоғары баға беріп, туындының сәтті шыққанын атап өтті.
