Алматы полицейлері есірткі сатушылардың әрекетін тоқтатты
Алматы полицейлері Жетісу ауданында есірткі сатушыларды ұстап, 1,5 келіден астам есірткі тәркіледі. Күдіктілердің бірі бұрын да қылмыстық жауапкершілікке тартылған.
Сурет: istockphoto
Алматының Жетісу ауданында тәртіп сақшылары есірткі сатумен айналысқан күдіктілерді ұстады. Жеке сектор аумағында алдымен бірнеше доза марихуана сатып алған ер адам қолға түсті.
Бұл туралы Qazaqtoday.info сайты хабарлайды.
Одан кейін жедел қызметкерлер есірткі сатты деген күдікпен тағы бір адамды ұстады. Оның үйін тінту кезінде 1,5 келіден астам зат табылды. Алдын ала мәлімет бойынша, тәркіленген зат есірткі болып саналады.
Ұсталған азаматтың бұған дейін де есірткі қылмыстары үшін қылмыстық жауапкершілікке тартылғаны анықталды. Аталған факті бойынша қылмыстық іс қозғалды. Полиция есірткінің қайдан жеткізілгенін және күдіктінің ықтимал сыбайластарын анықтап жатыр.
