Олжас Бектенов Қазақстан премьер-министрі лауазымына қайта тағайындалды

Фото: ҚР Үкіметі

Мемлекет басшысы Қасым-Жомарт Тоқаевтың жарлығымен Олжас Абайұлы Бектенов Қазақстан Республикасының Премьер-министрі болып қайта тағайындалды, деп хабарлайды Qazaqtoday.info сайты.

Бұл туралы Ақорданың баспасөз қызметі мәлімдеді. Олжас Бектенов 1980 жылы 13 желтоқсанда Алматы қаласында дүниеге келген. Ол 2001 жылы Қазақ мемлекеттік заң академиясын үздік бітіріп, «Заңгер» мамандығын алған. Екі дәрежелі «Айбын» (2014) және «Даңқ» (2021) ордендерімен марапатталған.

Оның еңбек жолы 2002-2005 жылдары Алматы қаласының Әділет басқармасында бас маман болып басталды. Кейін 2005-2006 жылдары ҚР Премьер-министрі Кеңсесінің заң бөлімінде сарапшы, ал 2006-2009 жылдары Президент Әкімшілігінде қызмет атқарды. 2009-2012 жылдары Әділет министрлігінің Тіркеу қызметі және құқықтық көмек көрсету комитеті төрағасының орынбасары болды.

2012-2014 жылдары Экономикалық қылмысқа және сыбайлас жемқорлыққа қарсы агенттіктің (қаржы полициясы) орталық аппаратында департамент бастығы қызметін атқарды. 2015-2016 жылдары Астана қаласы әкімінің аппарат басшысы, ҚР Президенті Әкімшілігі Басшысы Хатшылығының меңгерушісі болды. 2016-2017 жылдары Сыбайлас жемқорлыққа қарсы іс-қимыл Ұлттық бюросының Астана қаласы бойынша департаментін басқарды.

2017-2018 жылдары Ақмола облысы әкімінің орынбасары, 2018-2019 жылдары Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары қызметтерін атқарды. 2019-2022 жылдары Сыбайлас жемқорлыққа қарсы іс-қимыл агенттігі төрағасының бірінші орынбасары болса, 2022-2023 жылдары агенттік төрағасы болды. 2023-2024 жылдары Президент Әкімшілігін басқарды.

2024 жылғы ақпанда Мәжіліс депутаттары Мемлекет басшысының Олжас Бектеновті премьер-министр лауазымына тағайындау ұсынысына келісім берген еді. Бүгін Құрылтайдың жалпы отырысында депутаттар тағы да осы шешімді қолдады.