Белорустық туристер Алматы облысындағы мұздықтан адам мүрдесін тапты

Фото: кадр бейнежазбадан

Алматы облысының таулы аймағындағы Северцев мұздығынан табылған адам сүйегі тікұшақпен қауіпсіз жерге шығарылды. Төтенше жағдайлар министрлігі бұл эвакуацияның видеосын жариялап, оқиғаның мән-жайын айтты, деп хабарлайды Qazaqtoday.info.

ТЖМ мәліметінше, іздеу-құтқару жұмыстарына «Қазавиақұтқару» АҚ тікұшағы жұмылдырылды. Мәйіт теңіз деңгейінен шамамен 3400 метр биіктіктен түсіріліп, жеке басын анықтау және тиісті сараптамалар жүргізу үшін Алматы облысының жедел-тергеу тобына тапсырылды. Қазіргі уақытта оқиғаның барлық мән-жайы анықталып жатыр. Естеріңізге сала кетейік, марқұмның сүйегін, киімі мен жеке заттарын Беларусь елінен келген тау туристері тапқан.

Бұл туралы алғашқылардың бірі болып қала тұрғыны Анастасия Ахметова хабарлаған еді.

— Менің белорус достарым біздің тауларда екі апталық трекинг жасап шыққаннан кейін маған хабарласып, мұздықта адам мәйіті жатқанын хабарлап, видео көрсетті. Біз бірден 109 қызметіне қоңырау шалып, координаттар мен барлық фото-видео материалдарды жібердік. Енді марқұмның жеке басын анықтап, туыстарына қайтару үшін қажетті шаралар атқарылып жатыр, – деді ол.