Атырау облысындағы мұнай нысандарының әуе қорғанысы құпия ма?
Атыраудағы мұнай нысандарының әуе қорғанысы туралы қауесеттерге ресми органдар жауап берді. Қорғаныс министрлігі мәліметтерді мемлекеттік құпия деп санайды.
Сурет: azh.kz
Атырауда екі айға жуық уақыт бойы Атырау мұнай өңдеу зауыты ауданында әуе шабуылына қарсы құпия жүйе орнатылғаны туралы қауесет тарап жүр. Бұл туралы «ұзын құлақ» хабарлайды.
Сондай-ақ, облыстағы басқа да стратегиялық мұнай нысандары әуеден болуы мүмкін шабуылдардан қорғау үшін күшейтілген күзетке алынған көрінеді. Мұндай алдын алу шаралары Қазақстанның батысында тегі белгісіз ұшқышсыз ұшу аппараттарының (ҰҰА) бірнеше рет құлауына, украиндық ҰҰА-ның Каспий теңізіндегі Ресейдің мұнай инфрақұрылымы мен әскери нысандарына шабуыл жасауына, сондай-ақ әлемдегі геосаяси ахуалдың нашарлауына байланысты қабылданған.
Бұл ақпаратты растау немесе жоққа шығару үшін «АЖ» редакциясы АМӨЗ басшылығы мен Қорғаныс министрлігіне сұрау жолдады. Министрлікке Атырау облысының мұнай инфрақұрылымы (атап айтқанда, ТШО және NCOC компанияларының нысандары) әуеден болатын қасақана немесе әдейі емес шабуылдардан қаншалықты қорғалғаны туралы сұрақ та қойылды.
Алдымен зауыттан жауап келді: «“АМӨЗ” ЖШС сұрауда көрсетілген ақпаратқа түсініктеме беруге, растауға немесе жоққа шығаруға уәкілетті емес», өйткені «қорғаныс ұйымын құру, ұлттық қауіпсіздікті қамтамасыз ету, оның ішінде әуе шабуылына қарсы қорғаныс құралдарын қолдану мен орналастыру мәселелері ҚР мемлекеттік органдарының құзыретіне жатады».
Ал Қорғаныс министрінің орынбасары Асқар Мұстабеков қол қойған хатта: «Сіз сұраған мәліметтер мемлекеттік құпиялар санатына жатады және ұлттық қауіпсіздікті қамтамасыз ету мүддесінде жария етуге жатпайды. Сонымен қатар, уәкілетті мемлекеттік органдар Қазақстан Республикасының стратегиялық нысандарының қауіпсіздігін қамтамасыз етуге және ықтимал қауіптерге уақытылы ден қоюға бағытталған іс-шаралар кешенін тұрақты негізде жүзеге асыратынын хабарлаймыз» делінген.
Ресми органдар мәліметтерді мемлекеттік құпияға сілтеме жасап жария етпейді, бұл түсінікті, өйткені ұлттық қауіпсіздік туралы сөз болып отыр. Елдің барлық стратегиялық маңызды нысандары шынымен де сенімді қорғаныста болуына және қарастырылған қауіпсіздік шаралары қолданыстағы тәуекелдерге сәйкес болуына үміттенеміз. Бірақ бұл шаралар ешқашан қолданылмай, Атырау мен бүкіл Қазақстан аспаны бейбіт күйінде қалады деп сенгіміз келеді.
Лев ГУЗИКОВ
