Атырау аумағы 56 мың гектарға дейін ұлғайтылады

Сурет: azh.kz

Атырау қаласының аумағын кеңейту жоспарланып отыр. Қала аумағын 45 мың гектардан 56 мың гектарға дейін ұлғайту, ал 2040 жылға қарай халық санын 600 мың адамға жеткізу көзделуде. Мұндай көрсеткіштер облыс орталығының Бас жоспарына енгізілетін өзгерістер жобасында қарастырылған, деп хабарлайды Qazaqtoday.info сайты.

Қала құрамына сегіз қала маңындағы елді мекенді ресми түрде қосу ұсынылып отыр: Еркінқала, Тасқала, Жаңаталап, Қызылбалық, Құрманғазы, Амангелді, Дамба және Бесікті. Негізгі тұрғын үй құрылысын Атыраудың солтүстік бөлігінде жүргізу жоспарлануда.

Қазіргі таңда қала мен оған іргелес елді мекендерде 431 мыңнан астам адам тұрады. Қолданыстағы Бас жоспар 2016 жылы бекітілген болатын, оған қайта қарау 2024 жылдың мамырынан бастап жүргізілуде.

Жоба су басу аймақтарында, санитарлық-қорғаныш аймақтарында, сондай-ақ электр желілері мен магистральдық мұнай құбырларының маңында құрылыс жүргізуге шектеулер қоюды көздейді. Мұндай аумақтарда орналасқан нысандарды кезең-кезеңімен алып, бұзу жоспарлануда.

Шектеулер әуежайдың қорғаныш аймағын, қатты тұрмыстық қалдықтар полигондары мен қалалық зираттардың маңындағы аумақтарды да қамтиды. Қала шетінен тыс жерде ауданы 105 гектар болатын жаңа зират орналастыру көзделуде.

Атырау облысының әкімі Болат Акчулаков қаланы одан әрі дамыту кезінде су тасқыны қаупін ескеруді талап етті. «Новый Генеральный план должен исключить возможность строительства в зонах затопления и санитарно-защитных зонах», — деді өңір басшысы.

Жол желісі айтарлықтай кеңейеді. Магистральдық көшелердің ұзындығын 264,7 шақырымнан 695,1 шақырымға дейін арттыру жоспарлануда. Сондай-ақ жоба 12 көлік айрығын салуды қарастырады. Тұрғын аудандардан транзиттік көлікті шығаруға тиіс Атыраудың солтүстік айналма жолын 2027 жылы аяқтау жоспарлануда.

Бас жоспар бекітілгенге дейін облыс әкімі жобаланып жатқан және салынып жатқан автомобиль жолдары, инженерлік және әлеуметтік инфрақұрылым нысандарының шекараларында, сондай-ақ санитарлық-қорғаныш, қорғаныш және аумақтарды пайдаланудың ерекше шарттары бар өзге де аймақтарда жер учаскелерін беруді уақытша тоқтата тұруды тапсырды.

Акчулаков қалаға ұсынылған арық жүйесі мен өздігінен ағатын нөсер кәрізін де сынға алды. Әзірлеушілерге суды бұрудың заманауи шешімдерін қарастыру тапсырылды, кейін бұл суды жасыл желектерді суаруға пайдалануға болады.

Бұдан басқа, Атырауда кабельдік желілер мен инженерлік коммуникацияларды біртіндеп жер астына көшіру, сондай-ақ қала шегінде ағаш және бетон тіректерден бас тарту жоспарлануда.

Бас жоспар жобасы жиында айтылған ескертулер мен ұсыныстарды ескере отырып, пысықтауға жіберілді.