Халық Банкінің тәуелсіз директоры болып Хенк Ян Хугендорн бекітілді

Сурет: kz.kursiv.media

Қаржы нарығын реттеу және дамыту агенттігі Халық Банкінің тәуелсіз директоры және басқару органының мүшесі лауазымына Хенк Ян Хугендорнның кандидатурасын мақұлдады. Шешім 2026 жылғы 24 шілдеде қабылданды, деп хабарлайды Qazaqtoday.info сайты.

Хугендорн — Нидерланд азаматы. Қазір ол Дохада тұрып, Катар Қаржы Орталығында (Qatar Financial Centre) қаржылық қызметтер директоры болып жұмыс істейді. Бұл лауазымда ол Катарға шетелдік инвестицияларды, сондай-ақ банктерді, инвестициялық компанияларды, тікелей және венчурлық инвестициялық қорларды және басқа да қаржы ұйымдарын тартуға жауапты.

Жаңа тәуелсіз директордың халықаралық қаржы секторында 30 жылдан астам тәжірибесі бар. Ол бұрын ABN AMRO Банкінде және Deutsche Bank-те Нидерланд пен Таяу Шығыс елдерінде басшылық қызметтер атқарған, сондай-ақ Mashreq Qatar компаниясының бас директоры болған.

Deutsche Bank-те Хугендорн банктік емес қаржы институттарымен жұмыс бағытын басқарған. Оның жауапкершілігіне сақтандыру компаниялары, зейнетақы қорлары, финтех-компаниялар, сондай-ақ банктің Еуропадағы стратегиялық және бизнес-жоспарларын іске асыру кірген.

Хугендорн Нидерландтағы Утрехт университетін бітіріп, заң магистрі дәрежесін алған. Сонымен қатар ол London Business School және INSEAD-те басшыларға арналған бағдарламалардан өткен.

Ол сондай-ақ Wahed Inc компаниясының директорлар кеңесіне кіреді және Qazaqstan Investment Corporation директорлар кеңесінің мүшесі болып табылады.

Ұлттық Банктің 2026 жылғы 1 маусымдағы деректері бойынша, Халық Банкі активтері 20,97 трлн теңгеге жетіп, Қазақстандағы ең ірі банк болып отыр.

Бұған дейін Халық Банкінің акционерлері 20 тамызда жиналып, дивидендтер төлеу мәселесін шешетіні хабарланған болатын. Банктің директорлар кеңесі 2025 жылғы дивидендтерге 306,6 млрд теңге бөлуді ұсынып отыр.