Қазақстанда алименттерді аударудың жаңа тәртібі 2026 жылы күшіне енеді
2026 жылдың 25 тамызынан бастап Қазақстанда алименттерді аударудың жаңа тәртібі күшіне енеді. Енді ақша тек арнайы банк шотына аударылады.
Сурет: tengrinews.kz
2026 жылдың 25 тамызынан бастап Қазақстанда алименттерді аударудың жаңа тәртібі күшіне енеді, деп хабарлайды Qazaqtoday.info сайты Әділет министрлігінің баспасөз қызметіне сілтеме жасап.
Ведомство өкілдерінің айтуынша, жаңа ережелер балалар мен еңбекке жарамсыз адамдарды асырауға арналған қаражатты қосымша қорғауға бағытталған. Енді ақша тек алименттерді есептеуге арналған арнайы банк шотына ғана аударылады. Ол үшін өндіріп алушы сот орындаушысына осындай шоттың деректемелерін ұсынуы қажет.
Жаңашылдықтың басты мақсаты – баланың немесе еңбекке жарамсыз адамның асырауына арналған ақшаның сақталуын қамтамасыз ету. Қолданыстағы заңнамаға сәйкес, арнайы алименттік шоттағы ақшаға тыйым салуға болмайды.
«Талап сот орындау шеңберінде алимент алатын өндіріп алушыларға қолданылады. Дәл солар арнайы шот ашып, оның деректемелерін сот орындаушысына ұсынуға міндетті», — делінген хабарламада.
Министрлікте бұл өзгеріс алименттердің тікелей мақсаты бойынша жұмсалуына кепілдік береді деп санайды.
